Útbúnaður leikmannsins

Regla 3 Regla 5

Útbúnaður leikmannsins

The Rules of Golf

Sjá leikmannaútgáfu

4.1

Kylfur

Kylfur sem eru leyfðar til að slá högg

Hámark 14 kylfur. Að deila kylfum, bæta við og skipta um kylfur á meðan umferð er leikin

Aðferð við að lýsa kylfur úr leik

4.2

Boltar

Leyfilegir boltar við leik umferðar

Bolti brotnar við leik holu

Bolti skerst eða springur við leik holu

4.3

Notkun útbúnaðar

Leyfileg og óleyfileg notkun útbúnaðar

Útbúnaður sem er notaður af læknisfræðilegum ástæðum

Túlkanir vegna reglu 4

Regla 3

Regla 5

Túlkanir vegna reglu 4

Skoða fleira

Regla 3

Regla 5

Prenta hluta

Tilgangur: Regla 4 nær yfir útbúnaðinn sem leikmenn mega nota þegar umferð er leikin. Vegna þess grundvallaratriðis að golf er krefjandi leikur þar sem árangur á að ráðast af dómgreind, færni og hæfileikum leikmannsins verður hann að:

Nota leyfilegar kylfur og bolta,
Nota mest 14 kylfur og má að öllu jöfnu ekki skipta um skemmdar eða týndar kylfur, og
Sæta takmörkunum um notkun annars útbúnaðar sem er honum til aðstoðar við leik.

4 Útbúnaður leikmannsins

Varðandi ítarlegar kröfur um kylfur, bolta og annan og aðferðir við ráðgjöf og skil á til skoðunar með tilliti til reglnanna, sjá .

4.1 Kylfur

a

Kylfur sem eru leyfðar til að slá högg

(1) Leyfilegar kylfur. Við að slá högg verður leikmaðurinn að nota kylfu sem uppfyllir kröfur útbúnaðarreglnanna:

Kylfa sem er notuð við að slá högg verður að uppfylla kröfurnar bæði þegar hún er ný og einnig þegar henni hefur verið breytt á einhvern hátt, vísvitandi eða af slysni.
Hins vegar, ef leikeiginleikar leyfilegrar kylfu breytast vegna slits við venjulega notkun er kylfan enn leyfileg.

Með „leikeiginleikum“ er átt við sérhvern hluta kylfunnar sem hefur áhrif á hvernig hún hegðar sér þegar högg er slegið, svo sem gripið, skaftið, kylfuhausinn, leguna eða fláann (þar á meðal legu og fláa á stillanlegri kylfu).

(2) Notkun eða viðgerð á kylfu sem skemmist á meðan umferð er leikin. Ef leyfileg kylfa skemmist á meðan umferð er leikin, eða á meðan leikur er stöðvaður samkvæmt reglu 5.7a, má leikmaðurinn að öllu jöfnu ekki skipta um kylfuna. (Sjá reglu 4.1b(3) varðandi takmarkaða undantekningu þegar leikmaðurinn olli ekki skemmdunum).

Þó er litið svo á að skemmda kylfan sé leyfileg það sem eftir er umferðarinnar, óháð eðli eða ástæðu skemmdanna (en þetta á ekki við í umspili í höggleik, sem er ný umferð).

Það sem eftir er umferðarinnar má leikmaðurinn:

Halda áfram að slá högg með skemmdu kylfunni, eða
Láta gera við kylfuna með því að koma henni, að því marki sem hægt er, í það ástand sem hún var í áður en hún skemmdist við leik umferðarinnar eða við stöðvun leiks, með upphaflegu gripi, skafti og kylfuhaus. Þó má leikmaðurinn ekki:

Tefja leik um of (sjá reglu 5.6a), eða
Láta gera við neinar skemmdir sem voru á kylfunni áður en umferðin hófst.

„Skemmd á meðan umferð er leikin“ þýðir að leikeiginleikar kylfu hafi breyst vegna einhverrar athafnar á meðan umferðin var leikin (þar á meðal á meðan leikur var stöðvaður samkvæmt reglu 5.7a), hvort sem er:

Af leikmanninum (svo sem við að slá högg eða við æfingasveiflu með kylfunni, við að setja kylfuna í golfpoka eða taka hana úr golfpoka, missa hana, styðja sig við hana eða kasta henni eða misbjóða), eða
Af einhverjum öðrum einstaklingi, vegna utanaðkomandi áhrifa eða náttúruaflanna.

Þó hefur kylfa ekki „skemmst á meðan umferð er leikin“ ef leikeiginleikum hennar er vísvitandi breytt af leikmanninum á meðan umferðin er leikin, eins og fjallað er um í reglu 4.1a(3).

(3) Vísvitandi breyting á leikeiginleikum kylfu á meðan umferð er leikin. Leikmaður má ekki slá högg með kylfu ef hann hefur vísvitandi breytt leikeiginleikum hennar á meðan umferðin er leikin (þar á meðal á meðan leikur var stöðvaður samkvæmt reglu 5.7a):

Með því að nota stillingar eða breyta kylfunni með áþreifanlegum hætti (nema þegar leyft er að lagfæra skemmdir samkvæmt reglu 4.1a(2)), eða
Með því að bera eitthvað efni á kylfuhausinn (að undanskildu því að hreinsa hann) til að hafa áhrif á virkni kylfuhaussins þegar högg er slegið.

Undantekning – Stillanlegri kylfu breytt í upphaflega stillingu: Ef leikeiginleikum kylfu var breytt með stillingu og kylfunni er svo breytt í upphaflega stillingu, að því marki sem hægt er, áður en högg er slegið með henni er það vítalaust og nota má kylfuna til að slá högg.

Víti fyrir að slá högg í andstöðu við reglu 4.1a: Frávísun.

Það er vítalaust samkvæmt þessari reglu að bera (án þess að slá högg með) óleyfilega kylfu eða kylfu þar sem leikeiginleikum hefur vísvitandi verið breytt á meðan umferðin er leikin.
Þó er slík kylfa talin með, með tilliti til 14 kylfu hámarksfjöldans í reglu 4.1b(1).

b

Hámark 14 kylfur. Að deila kylfum, bæta við og skipta um kylfur á meðan umferð er leikin

(1) Hámark 14 kylfur. Leikmaður má ekki:

Byrja umferð með fleiri en 14 kylfum, eða
Hafa fleiri en 14 kylfur á meðan umferðin er leikin.

Ef leikmaðurinn byrjar umferð með færri en 14 kylfum má hann bæta við kylfum á meðan umferðin er leikin, upp að 14 kylfu hámarkinu (sjá reglu 4.1b(4) varðandi takmarkanir í því efni).

Ef leikmaðurinn uppgötvar að hann er brotlegur við þessa reglu með því að hafa fleiri en 14 kylfur verður hann tafarlaust að taka umframkylfuna eða -kylfurnar úr leik samkvæmt aðferðinni í reglu 4.1c(1):

Ef leikmaðurinn hóf leik með fleiri en 14 kylfum má hann velja hvaða kylfu eða kylfur hann tekur úr leik.
Ef leikmaðurinn bætti við umframkylfum á meðan umferðin var leikin verður að taka þær kylfur úr leik.

Eftir að umferð leikmannsins er hafin, ef leikmaðurinn hirðir upp kylfu sem hefur verið skilin eftir af öðrum leikmanni eða ef kylfa er sett fyrir mistök í golfpoka leikmannsins án hans vitneskju er ekki litið á kylfuna sem kylfu leikmannsins með tilliti til 14 kylfu hámarksins (en ekki má nota kylfuna).

(2) Kylfum ekki deilt. Leikmaður er bundinn við þær kylfur sem hann hóf leik með eða bætti við samkvæmt heimildinni í (1):

Leikmaðurinn má ekki slá högg með kylfu sem er notuð af einhverjum öðrum sem er að leika á vellinum (jafnvel þótt sá leikmaður sé í öðrum ráshópi eða í annarri keppni).
Ef leikmaðurinn uppgötvar að hann hefur brotið þessa reglu, með því að slá högg með kylfu annars leikmanns, verður leikmaðurinn tafarlaust að taka kylfuna úr leik samkvæmt aðferðinni í reglu 4.1c(1).

Sjá reglur 22.5 og 23.7 (takmörkuð undantekning í leikformum sem tengjast samherjum , þar sem samherjar mega deila kylfum ef þeir hafa samtals ekki fleiri en 14 kylfur).

(3) Ekki skipt um kylfur sem týnast eða skemmast. Ef leikmaður hóf leik með 14 kylfum, eða bætti við kylfum upp að 14 kylfu hámarkinu, og týnir síðan eða skemmir kylfu á meðan umferðin er leikin eða á meðan leikur hefur verið stöðvaður samkvæmt reglu 5.7a, má leikmaðurinn ekki skipta þeirri kylfu út fyrir aðra kylfu.

Undantekning – Skipt um kylfu ef leikmaðurinn olli ekki skemmdunum: Ef kylfa leikmanns skemmist á meðan umferð er leikin (þar á meðal á meðan leikur hefur verið stöðvaður (sjá reglu 4.1a(2)) af utanaðkomandi áhrifum eða náttúruöflunum eða af öðrum einstaklingi en leikmanninum eða kylfubera hans:

Má leikmaðurinn skipta skemmdu kylfunni út fyrir aðra kylfu samkvæmt reglu 4.1b(4).
Ef leikmaðurinn gerir það verður hann tafarlaust að lýsa skemmdu kylfuna úr leik, samkvæmt aðferðinni í reglu 4.1c(1).

(4) Takmarkanir þegar bætt er við kylfu eða skipt um kylfu. Þegar leikmaður bætir við kylfu eða skiptir um kylfu, samkvæmt (1) eða (3), má hann ekki:

Tefja leik um of (sjá reglu 5.6a),
Bæta við eða fá lánaða kylfu frá einhverjum öðrum sem er að leika á vellinum (jafnvel þótt sá leikmaður sé í öðrum ráshópi eða í annarri keppni), eða
Búa til kylfu úr kylfuhlutum sem einhver ber fyrir leikmanninn á meðan umferðin er leikin.

Víti fyrir brot á reglu 4.1b: Vítið ræðst af því hvenær leikmaðurinn vissi af brotinu:

Leikmaður uppgötvar brotið við leik holu. Vítinu er beitt við lok holunnar sem verið er að leika. Í holukeppni verður leikmaðurinn að ljúka holunni, bæta úrslitum þeirrar holu við stöðu leiksins og bæta vítinu síðan við stöðu leiksins.
Leikmaður uppgötvar brotið á milli hola. Vítinu er beitt við lok holunnar sem síðast var leikin, ekki á næstu holu.

Víti í holukeppni – Leikstaða endurskoðuð með því að draga frá holu, hámark tvær holur:

Um er að ræða víti sem felst í leiðréttingu á leikstöðu – sem er ekki það sama og holutapsvíti.
Við lok holunnar sem verið er að leika, eða síðustu holu sem var leikin, er leikstaðan endurskoðuð með því að draga frá eina holu fyrir hverja holu þar sem brot átti sér stað, en að hámarki eru dregnar frá tvær holur í umferðinni.
Til dæmis, ef leikmaður sem hóf leik með 15 kylfur er að leika 3. holu þegar brotið uppgötvast og vinnur síðan þá holu og er þrjár holur upp í leiknum, á tveggja holu hámarksleiðrétting við og leikmaðurinn er þá eina holu upp í leiknum.

Víti í höggleik – Tvö vítahögg, hámark fjögur högg: Leikmaðurinn fær almenna vítið (tvö vítahögg) fyrir hverja holu þar sem brot átti sér stað, en að hámarki fjögur vítahögg í umferðinni (hann bætir þá tveimur vítahöggum við fyrstu tvær holurnar þar sem brot átti sér stað).

c

Aðferð við að lýsa kylfur úr leik

(1) Á meðan umferð er leikin. Þegar leikmaður uppgötvar á meðan hann leikur umferð að hann er brotlegur við reglu 4.1b(1), (2) eða (3) með því að hafa fleiri en 14 kylfur eða með því að slá högg með kylfu annars leikmanns, verður leikmaðurinn tafarlaust að grípa til ráðstafana sem gefa greinilega til kynna hvaða kylfa eða kylfur eru teknar úr leik.

Þetta má gera með því að:

Lýsa þessu yfir við mótherjann í holukeppni eða ritarann eða annan leikmann í ráshópnum í höggleik, eða
Gera eitthvað annað ótvírætt (svo sem að snúa kylfunni á hvolf í golfpokanum, leggja hana á gólfið í golfbílnum eða afhenda hana einhverjum öðrum).

Leikmaðurinn má ekki slá högg það sem eftir er umferðarinnar með kylfu sem hefur verið tekin úr leik.

Ef kylfa sem tekin hefur verið úr leik tilheyrir öðrum leikmanni má sá leikmaður halda áfram að nota kylfuna.

Víti fyrir brot á reglu 4.1c(1): Frávísun.

(2) Fyrir umferð. Ef leikmaður verður þess áskynja stuttu áður en hann byrjar umferð að hann er óvart með fleiri en 14 kylfur ætti hann að leitast við að skilja umframkylfur eftir.

Þó er leyfilegt, vítalaust:

Að leikmaðurinn taki slíkar umframkylfur úr leik áður en umferðin hefst, með aðferðum sem lýst er í (1), og
Að leikmaðurinn geymi umframkylfurnar (án þess að nota þær) á meðan umferðin er leikin og eru þær þá ekki taldar með tilliti til 14 kylfu hámarksfjöldans.

Óleyfilegt er að mæta vísvitandi með fleiri en 14 kylfur á upphafsteig sinn og byrja umferðina án þess að skilja umframkylfurnar eftir. Regla 4.1b(1) á þá við.

4.2 Boltar

a

Leyfilegir boltar við leik umferðar

(1) Leika skal með leyfilegum bolta. Í hverju höggi verður leikmaður að nota bolta sem uppfyllir kröfur útbúnaðarreglnanna.

Leikmaður má útvega sér leyfilegan bolta hvaðan sem er, þar á meðal frá öðrum leikmanni á vellinum.

(2) Ekki má leika bolta sem hefur vísvitandi verið breytt. Leikmaður má ekki slá högg að bolta ef leikeiginleikum boltans hefur vísvitandi verið breytt, svo sem með því að rispa eða hita boltann eða með því að bera eitthvað efni á hann (til annars en að hreinsa hann).

Víti fyrir að slá högg andstætt reglu 4.2a: Frávísun.

b

Bolti brotnar við leik holu

Ef bolti leikmanns brotnar í hluta eftir högg er það vítalaust og höggið gildir ekki.

Leikmaðurinn verður að leika öðrum bolta þaðan sem fyrra höggið var slegið (sjá reglu 14.6).

Víti fyrir að leika bolta frá röngum stað, andstætt reglu 4.2b: Almennt víti samkvæmt reglu 14.7a.

c

Bolti skerst eða springur við leik holu

(1) Að lyfta bolta til að athuga hvort hann sé skorinn eða sprunginn. Ef leikmaður hefur ástæðu til að ætla að í bolta hans hafi myndast skurður eða sprunga, við leik holu:

Má leikmaðurinn lyfta boltanum til að skoða hann, en:
Fyrst verður að merkja staðsetningu boltans og ekki má hreinsa hann (nema á flötinni) (sjá reglu 14.1).

Ef leikmaðurinn lyftir boltanum án þess að hafa þessa rökstuddu ástæðu til þess (nema á flötinni þar sem leikmaðurinn má lyfta boltanum samkvæmt reglu 13.1b), merkir ekki staðsetningu boltans áður en hann lyftir boltanum eða hreinsar hann þegar það má ekki, fær leikmaðurinn eitt vítahögg.

Ef ein athöfn eða tengdar athafnir leiða til brota fleiri en einnar reglu með eins höggs víti, sjá reglu 1.3c(4).

(2) Hvenær skipta má um bolta. Leikmaðurinn má aðeins skipta um bolta ef augljóst er að upphaflegi boltinn er skorinn eða sprunginn og ef þessi skemmd varð við leik holunnar – en ekki ef boltinn er bara rispaður eða skafinn eða ef einungis málning boltans er skemmd eða upplituð.

Ef upphaflegi boltinn er skorinn eða sprunginn verður leikmaðurinn að leggja aftur annan bolta eða upphaflega boltann á upphaflega staðinn (sjá reglu 14.2).
Ef upphaflegi boltinn er hvorki skorinn né sprunginn verður leikmaðurinn að leggja hann aftur á upphaflega staðinn (sjá reglu 14.2).

Ekkert í þessari reglu bannar leikmanni að skipta um bolta samkvæmt einhverri annarri reglu eða að skipta um bolta á milli hola.

Víti fyrir að leika bolta sem ranglega hefur verið skipt um eða að leika bolta frá röngum stað, andstætt reglu 4.2c: Almennt víti samkvæmt reglu 6.3b eða 14.7a.

Ef ein athöfn eða tengdar athafnir leiða til brota fleiri en einnar reglu, sjá reglu 1.3c(4).

4.3 Notkun útbúnaðar

Regla 4.3 tekur til allra tegunda útbúnaðar sem leikmaður kann að nota á meðan hann leikur umferð, nema að kröfum um að leika með leyfilegum boltum og kylfum er lýst í reglum 4.1 og 4.2, en ekki í þessari reglu.

Þessi regla fjallar aðeins um hvernig útbúnaður er notaður. Hún setur engar skorður við hvaða útbúnað leikmaður hefur í fórum sínum á meðan umferð er leikin.

a

Leyfileg og óleyfileg notkun útbúnaðar

Leikmaður má nota útbúnað til aðstoðar við leik umferðar, nema að leikmaðurinn má ekki fá hugsanlegt forskot með því að:

Nota útbúnað (annan en kylfu eða bolta) sem minnkar þörf fyrir nauðsynlega hæfni eða dómgreind til að takast á við leikinn, eða
Nota útbúnað (þar á meðal kylfu eða bolta) á óeðlilegan hátt við að slá högg. Á „óeðlilegan hátt“ merkir á einhvern hátt sem er í grundvallaratriðum öðruvísi en útbúnaðurinn er hannaður til og er venjulega ekki talinn hluti þess að leika golf.

Þessi regla hefur ekki áhrif á beitingu annarra reglna sem takmarka þær athafnir sem leikmanni eru heimilar með kylfu, bolta eða öðrum útbúnaði (svo sem að leggja kylfu eða annan hlut á jörðina til að aðstoða leikmanninn við miðun, samanber reglu 10.2b(3)).

Algeng dæmi um notkun útbúnaðar sem er leyfð eða ekki leyfð við leik umferðar samkvæmt þessari reglu eru:

(1) Fjarlægðar- og stefnuupplýsingar.

Leyft.

Að afla upplýsinga um fjarlægðir eða stefnu (svo sem með fjarlægðarmæli eða áttavita).

Ekki leyft.

Að mæla hæðarmun, eða
Að túlka fjarlægðir eða stefnuupplýsingar (t.d. að nota tæki til að fá tillögu um leiklínu eða kylfuval, sem byggir á staðsetningu bolta leikmannsins).

Sjá Verklag nefnda, hluta 8 og fyrirmynd staðarreglu G-5 (nefndin má setja staðarreglu sem bannar notkun fjarlægðarmæla).

(2) Upplýsingar um vind og önnur veðurskilyrði.

Leyft.

Að afla hvers konar veðurupplýsinga (þar á meðal um vindhraða) sem eru fáanlegar úr veðurspám, eða
Að mæla hita- og rakastig á vellinum.

Ekki leyft.

Að mæla vindhraða á vellinum, eða
Að nota manngerða hluti til að afla annarra upplýsinga tengdum vindi (svo sem að nota duft til að meta vindátt).

(3) Upplýsingar sem safnað er fyrir umferð eða á meðan umferð er leikin.

Leyft.

Að nota upplýsingar sem var safnað áður en umferðin hófst (svo sem leikupplýsingar frá fyrri umferðum, sveifluráð eða ráðleggingar um kylfuval), eða
Upptökur (til nota eftir umferðina) á leik- eða lífeðlisfræðilegum upplýsingum úr umferðinni (svo sem högglengd kylfa, leiktölfræði eða hjartslætti).

Ekki leyft.

Að vinna úr eða túlka upplýsingar sem lúta að umferðinni sem verið er að leika (svo sem ráðleggingar um kylfuval, byggt á fjarlægðum í yfirstandandi umferð), eða
Að nota lífeðlisfræðilegar upplýsingar sem safnað er á meðan umferðin er leikin.

(4) Hljóð og myndbandstækni.

Leyft.

Að hlusta á hljóð eða horfa á myndbönd sem tengjast ekki keppninni (svo sem fréttir eða bakgrunnstónlist).
Þó ætti að sýna öðrum tillitssemi (sjá reglu 1.2).

Ekki leyft.

Að hlusta á tónlist eða önnur hljóð til að eyða truflunum eða til að aðstoða við sveiflutakt, eða
Að horfa á myndband af leikmanninum eða öðrum leikmönnum meðan á keppninni stendur, sem aðstoðar leikmanninn við kylfuval, að slá högg eða að ákveða hvernig skuli leika í umferðinni.

Sjá Verklag nefnda, hluta 8 og fyrirmynd staðarreglu G-8 (nefndin má setja staðarreglu sem bannar eða takmarkar notkun hljóð- eða myndtækja á meðan umferð er leikin).

(5) Hanskar og gripefni.

Leyft.

Að nota einfaldan hanska sem uppfyllir kröfur útbúnaðarreglnanna,
Að nota klístur, púður eða annað raka- eða þurrkefni, eða
Að vefja handklæði eða vasaklút um gripið.

Ekki leyft.

Að nota hanska sem samræmist ekki kröfum útbúnaðarreglnanna, eða
Að nota annan útbúnað sem veitir ósanngjarnt forskot við stöðu handa eða gripþrýsting.

(6) Teygjubúnaður og æfinga- eða sveiflutæki.

Leyft.

Að nota einhvern útbúnað við almennar teygjur (aðrar en við æfingasveiflu), hvort sem útbúnaðurinn er hannaður fyrir teygjur, til nota í golfi (svo sem miðunarstöng sem lögð er yfir axlir) eða til annarra nota, óskyld golfi (svo sem gúmmíslöngur eða rörbútar).

Ekki leyft.

Að nota einhvers konar æfingatæki eða sveifluæfingabúnað fyrir golf (svo sem miðunarstöng, þyngda kylfuhlíf eða „kleinuhring“) eða óleyfilega kylfu við æfingasveiflu eða á annan hátt sem veitir hugsanlegt forskot með því að aðstoða leikmanninn við að undirbúa eða slá högg (svo sem varðandi sveifluhorn, grip, miðun, staðsetningu bolta eða uppstillingu líkama).

Nánari leiðbeiningar um notkun útbúnaðar sem lýst er hér að framan og aðrar gerðir útbúnaðar (svo sem fatnað og skó) er að finna í útbúnaðarreglunum.

Leikmaður sem er óviss um hvort hann megi nota útbúnað á tiltekinn hátt ætti að óska eftir úrskurði nefndarinnar (sjá reglu 20.2b).

Sjá Verklag nefnda, hluta 8 og fyrirmynd staðarreglu G-6 (nefndin má setja staðarreglu sem bannar notkun vélknúinna ökutækja á meðan umferð er leikin).

b

Útbúnaður sem er notaður af læknisfræðilegum ástæðum

(1) Læknisfræðileg undanþága. Leikmaður brýtur ekki reglu 4.3 ef hann notar útbúnað til aðstoðar vegna læknisfræðilegs ástands, svo fremi að:

Leikmaðurinn hafi læknisfræðilega ástæðu til að nota útbúnaðinn, og
Nefndin ákvarði að notkun útbúnaðarins veiti leikmanninum ekki ósanngjarnt forskot á aðra leikmenn.

(2) Plástur eða svipuð límbönd. Leikmaður má nota plástur eða svipuð límbönd, af hvaða læknisfræðilegum ástæðum sem er (svo sem til að fyrirbyggja meiðsli eða vegna yfirstandandi meiðsla), en plásturinn eða límbandið má ekki:

Nota í óhófi, eða
Aðstoða leikmanninn meira en nauðsynlegt er vegna læknisfræðilegra ástæðna (til dæmis með því að stífa liði til að aðstoða leikmanninn við að sveifla kylfunni).

Leikmaður sem er óviss um hvar eða hvernig hann má nota plástur eða svipuð límbönd ætti að óska eftir úrskurði nefndarinnar.

Víti fyrir brot á reglu 4.3:

Víti fyrir fyrsta brot vegna einnar athafnar eða tengdra athafna: Almennt víti.
Víti fyrir annað brot, ótengt fyrsta brotinu: Frávísun. Þetta víti á við þótt eðli brotsins sé gjörólíkt brotinu sem olli fyrsta vítinu.